Sóley sló persónulegt met í Sandá

„Ég  var í svona korter  ná henni , hún var alveg brjáluð,“ segir Sóley Kristjánsdóttir vörumerkjastjóri hjá Ölgerðinni um  stærðarinnar hrygnu sem hún veiddi í Sandá í Þistilfirði síðustu helgi.

Hrygnan mældist 85 sentimetrar  og er stærsti fiskur sem Sóley hefur veitt. Sóley sem  var í veiði í ánni ásamt eiginmanni sínum og vinum segir hrygnuna augljóslega hafa lent í miklum ævintýrum áður en hún náði henni á land.

„Hún hafði  verið veidd daginn áður af vini mínum og var auðþekkjanleg því hún var mjög rispuð og illa farin. Líklega eftir sel.  Hún hefur því greinilega reynt ýmislegt þessi hrygna, en við slepptum henni aftur og hún væntanlega lent í nýjum ævintýrum.“

Sóley sem smitaðist af veiðidellu  fyrir um 11 árum segir fiskana hafa verið fáa í ánni en mjög stóra. „Ég veiddi þennan á litla einkrækju sem hnýtt var með Portlandbragðinu  á flugu sem heitir Johnnie Walker. Þetta er fluga sem vann fluguhnýtingakeppni í veiðibúðinni Veiðiflugur og hefur reynst mér vel.“