Boladagurinn er hafinn

Hætt er við því að erlendar stórstjörnur fái lítinn frið fyrir íslenskum Twitter-notendum næsta sólarhringinn. Í hönd er farinn Boladagurinn.

Í stuttu máli gengur Boladagurinn út á að Íslendingar trufla erlendar stórstjörnur og reyna að fá svar frá þeim á Twitter með öllum tiltækum ráðum. Sá sem fær besta svarið frá stærstu stjörnunni, að mati dómnefndar Boladags, stendur uppi sem sigurvegari.

Boladagurinn hófst klukkan 22 en honum lýkur á miðnætti annað kvöld.

Á heimasíðu keppninnar kemur fram að ekki séu gefin atkvæði fyrir að trufla íslenskar stjörnur. Aðeins erlendar stjörnur má ónáða en sigurvegari í keppninni í fyrra, blaðamaðurinn Sigurður Mikael Jónsson, fékk svar frá körfuboltahetjunni Dennis Rodman.

Óhætt er að segja að Sigurður Mikael hafi lagt sig allan fram. Þannig sendi hann Rodman mynd af gömlum körfuboltamyndum sem hann átti af kappanum, og uppskar svar frá hetjunni sinni fyrir vikið.

Veitt voru fjölmörg verðlaun í keppninni í fyrra sem lesa má um hérna. Aðalverðlaunin í ár eru Ipad Mini í boði Símans.

Aðeins notendur Twitter geta tekið þátt í keppninni og því þarf að skrá sig á síðuna. Hins vegar geta allir fylgst með gangi mála með því að smella hér.

Til að allir sjái það sem fram fer á Boladeginum er nauðsynlegt að nota "hashtagið" #boladagur, þ.e. merkja færslur sínar með merkinu # og textanum 'boladagur'. Þeir sem fá svar, eða 'retweet' eins og það er kallað, þurfa að senda skjáskot af samskiptunum á boladagur@boladagur.is.

Um 9000 tíst voru send til stórstjarnanna í fyrra og bárust um 200 svör frá fræga fólkinu. Það verður fróðlegt að sjá hvernig Íslendingum gengur að ná til stjarnanna úti í hinum stóra heimi.