Harmageddon

Sannleikurinn: Ef forsætisráðherra sagði satt verður hann tafarlaust að segja af sér

Andri Þór Sturluson skrifar
Um leið og þessi maður segir satt er honum ekki treystandi lengur til að stjórna landinu.
Um leið og þessi maður segir satt er honum ekki treystandi lengur til að stjórna landinu.
Forsætisráðherra þvertekur nú fyrir að hafa sagt ósatt í umræðum á þinginu í fyrradag eða reynt að villa um fyrir Alþingi, þegar deilt var um lækkun barnabóta, ásamt fleiru. Þá hefur hann væntanlega verið að segja satt.

Sé það rétt hjá Sigmundi á hann auðvitað tafarlaust að segja af sér. Forsætisráðherra sem viðurkennir svona blákalt að hafa sagt satt á Alþingi Íslendinga hefur gert sig óhæfan til að sinna því embætti og er enginn leiðtogi Framsóknarflokksins.

Forsætisráðherra sem segir sannleikann er ekki treystandi til að leiða þjóðina gegnum þann öldudal sem hún er stödd í og allt heiðarlegt tal um áætlanir ríkisstjórnarinnar getur stefnt þjóðarbúinu í voða.

Því á tímum sem þessum þurfum við óheiðarleikann. Við þurfum þá festu sem leiðtogar eins og Davíð Oddsson, Halldór Ásgrímsson og Geir Haarde höfðu og notuðu til að halda upplýsingum frá þjóðinni, eintómum vitleysingum sem með öllu eru óhæfir til að mynda sér rétta skoðun í nokkru máli, sama hversu lítilfjörlegt það er.

Aðeins með skorti á upplýsingum, lygum og brellum er hægt að ná aftur þeim stöðugleika sem hér ríkti á árunum fyrir hrun og færði okkur öllum velmegun og í sumum tilvikum auðæfi.

Nú reynir á hvort við ætlum að vera áfram vestrænt lýðræðisríki eða ætlum að skipa okkur sérstakan sess sem eitthvað ímyndað draumóraríki þar sem stjórnmálamenn eru heiðarlegir og segja satt. Og hvaða gagn myndi sannleikurinn færa okkur?

Við, sem þekkt erum sem áhættusæknir álfar með mikilmennskubrjálæði um allan heim, yrðum endanlega knésett sem þjóð ef allt væri hér upp á borðum. Ef stjórnmálamenn segðu okkur satt og öllum hér væri gert það ljóst að við værum með allt niðrum okkur þá væri hér ekki búandi. Hér er lögreglan, heilbrigðiskerfið, menntakerfið og bankastarfsemi nánast í rúst en með þekkingarleysi okkar og afneitun að vopni getum við logið því að okkur að þetta sé allt í lagi. Þannig getum við þraukað og sætt okkur við þá staðreynd að það er hvort sem er ekkert hægt að gera. Því við verðum að nota það litla fé sem við höfum til að halda útgerðarmönnunum (Köllunum okkar) góðum svo þeir bara taki ekki fiskinn og fari með hann annað.

Það er ljóst að hafi Sigmundur sagt satt beri að víkja honum úr embætti. Hann þarf að svara einni spurningu: Sagði forsætisráðherra satt á Alþingi? Svarið er annaðhvort "já" eða "nei". Hafi forsætisráðherra sagt satt er hann enginn stjórnmálamaður og allra síst formaður Framsóknarflokksins. Hafi hann sagt Alþingi ósatt er allt eðlilegt og eins og það hefur alltaf verið og við getum haldið áfram í blekkingu og hugsanlega skapað nýja bólu sem við getum haft það náðugt í um nokkurt skeið.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt.
 Fréttastofa Sannleikans hefur Facebook-síðu sem er frekar óheiðarleg.









Velkomin á Vísi. Þessi vefur notar vafrakökur. Sjá nánar.