Formaður Stúdentaráðs: Lágmarkskrafa að hækkunin skili sér til skólans

María Rut Kristinsdóttir, formaður Stúdentaráðs Háskóla Íslands, segir það vera algjöra lágmarkskröfu að fyrirhuguð hækkun á skrásetningargjöldum skólans úr 60 þúsund krónum í 75 þúsund krónur skili sér til skólans.

Eins og greint var frá í dag mun skólinn aðeins fá 40 milljónir af þeim 213 milljónum sem gjaldið gefur. Afgangurinn fer í ríkissjóð.

Í aðsendri grein til Vísis segir María að staðan í skólanum sé háalvarleg. „Skólinn er fjársveltur og við nemendur vitum að hækkunin er gerð af illri nauðsyn. Stærstur hluti tekna vegna gjaldsins mun aldrei skila sér til Háskólans þar sem framlag ríkissjóðs lækkar um sömu fjárhæð á móti, skrifar María og setur spurningamerki við lögmæti aðgerðarinnar.

„Sé ætlunin að hækka skrásetningargjöld hefur Stúdentaráð Háskóla Íslands gert þá skýlausu kröfu að þeir fjármunir sem eiga að koma til með hækkun skrásetningargjalda skili sér inn í þá liði sem þeim er ætlað að standa undir. Annars getum við bara kallað þetta það sem það er: sérstakan skatt á námsmenn.“

María vitnar í nefnarálit Efnahags- og viðskiptanefndar Alþingis þar sem fram kemur að meirihlutinn telji að hækkun skólagjalda kunni að hvetja námsmenn til að nýta betur það nám sem opinberir háskólar bjóða uppá.

„Nú spyr ég, hvernig í ósköpunum er það hvetjandi fyrir námsmenn við HÍ að borga meira fyrir minni gæði?“