„Málið komið í djúpu kistuna hjá sérstökum saksóknara“

Dómari úrskurðaði í hádeginu í dag að skaðabótamáli slitastjórnar Glitnis gegn níu fyrrverandi stjórnendum og helstu eigendum bankans skuli frestað um ótákveðinn tíma meðan rannsókn sérstaks saksóknara er í gangi.

Fyrirtaka var í Héraðsdómi Reykjavíkur í dag þar sem hart var tekist á en síðasta fyrirtaka í málinu var í gær þar sem slitastjórnin lagði fram beiðni um frestun málsins vegna rannsóknarinnar. Þar var lagt fram bréf frá sérstökum saksóknara þar sem embættið upplýsti um að til rannsóknar væri 15 milljjarða króna víkjandi lán frá Glitni til Baugs í desember 2007.

Óánægðir með seinagang

Lögmenn níumenninganna voru óánægðir með vinnubrögð slitastjórnarinnar og lögðust gegn því að málinu yrði frestað.

Gestur Jónsson, lögmaður Jóns Ásgeirs Jóhannessonar fyrrverandi forstjóra Baugs, tók fyrstur til máls og sagði ekkert nýtt komið fram í málinu sem hafa eigi þau áhrif að því skuli frestað.

Þá sagði Jakob L. Möller, lögmaður Jóns Sigurðssonar, fyrrverandi forstjóra FL Group, að ekkert komi fram í bréfi sérstaks saksóknara annað en ða rannsókn sé á byrjunarstigi. Hann taldi að málið væri þannig komið í djúpu kistuna hjá embættinu og velti því upp hvort stefndu gætu þá næst vænst frétta af því á árinu 2016. Hann krafðist þess að settur yrði þrýstingur á sérstakan saksóknara að upplýsta um stöðu málsins.

Málið áður verið tilkynnt til sérstaks saksóknara

Þá spurð Pétur Þór Sigurðsson, lögmaður Björns Inga Sveinssonar, forstjóra Saxbygg, um afdrif tilkynningar slitastjórnarinnar til Tryggingamiðstöðvarinnar frá 5. apríl 2011, sem er meðal ganga sem fram hafa verið lögð í málinu. Í þeirri tilkynningu kemur að sögn þeirra fram að slitastjórnin hafi áður tilkynnt sérstökum saksóknara um lánið og að hún líti svo á að stefndu hafi með því brotið gegn almennum hegningarlögum. Þeir sögðu þá tilkynningu greinilega að engu hafandi, líkt og þeirri síðari sem lögð var fram við fyrirtöku málsins í gær.

Lögin eru skýr

Hróbjartur Jónatansson, lögmaður slitastjórnarinnar, var ekki viðstaddur fyrirtökuna, en hann mun vera erlendis. Í hans stað mættu lögmennirnir Sveinn Jónatansson, bróðir Hróbjarts, og Jón Þór Ólason. Þeir svöruðu litlu til um afdrif þeirrar tilkynningar og sögðust myndu upplýsa um það á síðari stigum ef þess gerðist þörf.

Þá sögðu þeir að lögin séu skýr, málinu bæri að fresta þar sem rannsókn stæði yfir á refsiverðu athæfi sem hefði verulega þýðingu fyrir afdrif skaðabótamálsins. Mótmæli lögmanna stefndu breyttu engu þar um.

Þýðing rannsóknar sérsaks saksóknara

Sigurbjörn Magnússon, lögmaður Katrínar Pétursdóttur fyrrverandi forstjóra Lýsis, spurði lögmenn slitastjórnarinnar að því hvaða þýðingu það myndi hafa ef málið yrði fellt niður hjá sérstökum saksóknara. Sveinn svaraði því til að eðlilega gæti það haft áhrif í báðar áttir hver afdrif rannsóknar sérstaks saksóknara yrðu, og mögulega umbjóðanda Sigurbjörns í hag.

Því var einnig velt upp í fyrirtökunni í dag af hverju málið var ekki tilkynnt fyrr til sérstaks saksóknara, af hverju liðið hafi eitt og hálft ár frá því að því var stefnt og þar til málið var tilkynnt af slitastjórinni til sérstaks saksóknara.

Lítið var um svör hjá slitastjórninni við því spurði þá einn lögmannanna dómara að því hvort þeir ættu að bera ábyrgð á fjarveru aðallögmanns stefnanda í málinu.

Málinu frestað

Að endingu greip dómari inn í umræðuna og sagði hana tæmda. Hann tók sér síðan stutt hlé áður en hann kvað upp sinn úrskurð um að fresta málinu um óákveðinn tíma. Sá úrskurður er kæranlegur til Hæstaréttar innan tveggja vikna.