Plain Vanilla leiðréttir öryggisgalla í QuizUp

Öryggisgalli í spurningaleiknum QuizUp hefur vakið reiði.

Fyrst var fjallað um málið á tæknivefnum Tech Crunch. Þar kemur fram að hægt er að komast yfir persónuupplýsingar spilenda þegar þær fara á milli tækja.

Fyrirtækið Plain Vanilla gaf út leikinn í nóvember en QuizUp hefur slegið rækilega í gegn í heiminum og hafa nú yfir þrjár milljónir manna halað niður smáforritinu. 

Hugbúnaðarframleiðandinn Kyle Richter segir að ákveðinn öryggisgalli sé á leiknum.

Richter vill meina að notendur geti nálgast persónuupplýsingar eins og tölvupóstfang, kyn, afmælisdag og séð myndir af spilendum, sem að öllu jafna er aðeins aðgengilegt milli vina á samskiptamiðlinum Facebook.

Þorsteins Friðriksson, framkvæmdastjóri Plain Vanilla, segir í samtali við Tech Crunch að gallinn sé til staðar en vill samt sem áður meina að Kyle Richter hafi ekki alfarið rétt fyrir sér.

Villa hafi komið upp sem geri dulkóðun leiksins í sumum tilvikum of veika en fyrirtækið hafi strax gripið inn í og búið sé að laga þennan galla.

Uppfærsla af leiknum verði því send út á næstunni.

Fram kemur í greininni að Kyle Richter sé eigandi fyrirtækisins Dragon Froged Software sem einnig framleiðir spurningaleiki af svipuðum toga og QuizUp og því í beinni samkeppni við Plain Vanilla.