Mörg þúsund mótmæla uppsögnum á RÚV

1.300 manns hafa boðað komu sína á mótmæli fyrir utan útvarpshúsið við Efstaleiti í dag, en mótmælin eru undir yfirskriftinni Stöndum með Ríkisútvarpinu.

„Við mótmælum yfirvofandi niðurskurði til Ríkisútvarpsins í nýju fjárlagafrumvarpi og þeirri forgangsröðun sem þar birtist hjá ríkisstjórninni,“ segir í lýsingu um mótmælin á Facebook, en mótmælin hefjast klukkan 12:30.

Þá hafa rúmlega 8.000 skrifað undir áskorun til menntamálaráðherra um að afturkalla uppsagnir á RÚV, en 39 starfsmönnum var sagt þar upp í gær. Ríkisútvarpið ætlar að skera niður um 500 milljónir króna og fækka starfsmönnum alls um 60.

Þeirra á meðal eru Margrét Erla Maack og Jóhannes Kr. Kristjánsson úr Kastljósinu, og Adolf Ingi Erlingsson íþróttafréttamaður.