Hannes Smárason mætti ekki fyrir dóm

Mál sérstaks saksóknara gegn Hannesi Smárasyni var þingfest í Héraðsdómi Reykjavíkur í morgun.

Hannes var þó ekki mættur fyrir dóminn þar sem hann er búsettur erlendis og óskaði verjandi hans eftir því að málinu yrði frestað sem dómarinn féllst á.

Það verður næst tekið fyrir þann 9. janúar á næsta ári þar sem Hannes mun taka afstöðu til ákærunnar.

Verjandinn sagði fyrir dómi í morgun að hann myndi hugsanlega leggja fram frávísunarkröfu í næsta þinghaldi.

Hannes er ákærður fyrir að hafa dregið sér hátt í þrjá milljarða króna af reikningi FL Group árið 2005.