Sannleikurinn: Sjálfstæðisflokkurinn tapaði í prófkjöri sjálfstæðismanna

Kjósendur í prófkjöri Sjálfstæðisflokksins í Reykjavík kusu Halldór Halldórsson til að tapa fyrir Bjartri Framtíð í sveitarstjórnarkosningunum á næsta ári.

Halldór hlaut 1.802 atkvæði í fyrsta sætið sem rétt dugar honum til að fá að leiða ósigur sjálfstæðismanna en fylgi flokksins hefur aldrei mælst minna en nú.

„Valtaði yfir kellingarnar, það er það sem er mér efst í huga núna,“ sagði Halldór í samtali við fréttastofu er úrslitin voru ljós. „Landsbyggðarlúðinn leiðir í Reykjavík. Það verður slagorðið mitt. Ég hef komið þangað nokkrum sinnum.“

Spurður um hvernig honum lítist á listann eftir prófkjörið segir Halldór að hópurinn sé frekar glataður. „Það er náttúrulega ekki eðlilegt að maður geti bara flutt til Reykjavíkur og hirt efsta sæti í prófkjöri. Það segir mikið um hvað fólkið sem maður var að keppa við er mikið drasl.“

Hann segir að mjög fljótlega muni hann hitta draslið og fara vel yfir stöðuna. „Ég ætla að nýta veturinn vel til að koma mér upp persónuleika.“





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en hún er á Ísafirði.