Steinsmýrarvötn komin til SVFR

SVFR hefur samið um leigu á Steinsmýrarvötnum frá og með næsta sumri.  Þessu hljóta félagsmenn SVFR að fagna enda svæðið einstaklega gjöfult og vinsælt til veiða.

Í tilkynningu frá félaginu segir:  "SVFR hefur undirritað samning um leigu á veiðirétti í Steinsmýrarvötnum frá og með næstkomandi sumri fram til og með 2016. Svæðið er fjölbreytt og skemmtilegt og félagsmönnum SVFR að góðu kunnugt. Veitt er á fjórar stangir og er veiðitíminn frá 1. apríl til 10. október. Fínasta veiðihús fylgir svæðinu og eru í því tvö svefnherbergi, svefnloft, heitur pottur og vöðluskúr. Öll helstu þægindi er að finna í húsinu og geta allt að átta manns hæglega gist í því.

Í Steinsmýrarvötnum fá veiðimenn og -konur margt í einum pakka. Veiðisvæðið samanstendur af tveimur vötnum og lækjum sem renna í og úr vötnunum og eru þessir staðir oft mjög gjöfulir. Steinsmýrarvötn eru staðsett fyrir neðan bæinn Syðri-Steinsmýri og eru í göngufæri frá veiðihúsinu.

Í Steinsmýravötnum er staðbundin bleikja og urriði ásamt sjóbirtingi og sjóbleikju. Yfir sumarið, eða í júní og júlí, veiðist vel af bleikju og er hún gríðarvæn í vötnunum en meðalþyngdin á henni hefur verið rúm 3...pund. Í ágúst byrjar svo sjóbirtingurinn að ganga og er hann að ganga langt fram að áramótum og tímabilið frá ágúst og út veiðitímann því yfirleitt mjög gott" segir meðal annars í fréttatilkynningu frá SVFR.