Harmageddon

Ný plata frá Strigaskóm nr. 42 er komin út

Frosti Logason skrifa
Fjórir félagar úr Kópavogi saman í hljómsveit í bráðum aldarfjórðung.
Fjórir félagar úr Kópavogi saman í hljómsveit í bráðum aldarfjórðung. Mynd/Reykjavik Grapevine

Hljómsveitin Strigaskór nr. 42 hefur sent frá sér nýja breiðskífu. Platan inniheldur tíu lög og heitir Armadillo. Sveitin var ein af lykilgerendum í íslensku dauðarokksenunni hinni fyrri, ásamt sveitum eins og Sororicide, In Memoriam, Inflammatory, Cranium og fleirum.

Strigaskór gáfu út sitt höfuðverk árið 1994, plötuna Blót, en hún er af mörgum talin vera ein sú merkilegasta í íslenskri rokksögu til dagsins í dag.  Þá hafði hljómur sveitarinnar gerjast vel og sérkenni hennar orðið að einhverskonar þjóðlegu-síðdauðarokki. 

Strigaskór nr. 42 saman stendur enn af sama mannskap, tæpum tuttugu árum eftir útgáfu fyrstu plötunnar. Fjórir félagar úr Kópavogi sem gera rokktónlist eins og enginn annar.
Harmageddon fagnar þessum gleðitíðindum úr Kópavogi og óskar sveitinni og aðdáendum til hamingju.  Platan er gefin út á rafrænu formi og er fáanleg á Gogoyoko og fleiri tónlistarveitum.

Útgáfutónleikar vegna útkomu plötunnar verða haldnir síðar. Sveitin mun þó flytja bróðurpart hennar á Rokkjötnum í Kaplakrika þann 5. október næstkomandi og þá kemur sveitin fram á Iceland Airwaves í byrjun nóvember.

Meðlimir sveitarinnar eru:
Ari Þorgeir Steinarsson - Trommur
Gunnar Reynir Valþórsson - Gítar
Hlynur Aðils Vilmarsson - Gítar og söngur
Kjartan Róbertsson - Bassi

Hér fyrir neðan má heyra tóndæmi af nýju plötunni. Lagið Hellmut sem er ágætis dæmi um hvers vegna margir telja Strigaskó vera svölustu rokksveit Íslands.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.



Velkomin á Vísi. Þessi vefur notar vafrakökur. Sjá nánar.