Hversu slæmur er fótur forsætisráðherrans?

Harmageddon veltir því fyrir sér hvað ósamstæðir skór geta sagt til um þá persónu sem í þeim stendur. Það er að sjálfsögðu nýleg uppákoma á fundi norrænna stjórnmálaleiðtoga með Barrack Obama, Bandaríkjaforseta sem veldur því að menn fari að hugsa.

Það að forsætisráðherra Íslands skyldi hafa ákveðið að mæta á opinberan fund þjóðarleiðtoga í ósamstæðum skóm þarf auðvitað ekki endilega að segja neitt um dómgreind ráðherrans í öðrum málum.

Því skyndileg skæð sýking í fæti getur vissulega haft alvarlegri afleiðingar en margan gæti grunað í fyrstu. Fólk getur rétt ímyndað sér hversu andstyggilegur fótur Sigmundar Davíðs getur orðið þegar í hann hleypur einhver viðskotaill pest sem erfitt er að halda niðri með seinvirkum sænskum fúkkalyfjum. Í slíkum aðstæðum má oft gera ráð fyrir því að dómgreind manna sljóvgist.

Þess vegna er það ef til vill ekkert óeðlilegt að Sigmundi dytti ekki í hug að kaupa, eða láta kaupa fyrir sig, tvö pör af sömu leðurlakkskónum í sitthvorri stærðinni. Vera svo í stærra númerinu á úldna fætinum og hans réttu skóstærð á hinum. 

Það er auðvitað eðlilegt að menn velti upp spurningum við aðstæður sem þessar. En ef málið er grannt skoðað þá er er stærsta spurningin þessi. Maður sem ákveður að mæta í ósamstæðum skóm til fundar við áhrifamesta og valdamesta mann veraldar, mjög líklega í fyrsta og síðasta skiptið á ævinni, er hann líklegur til þess að geta leyst einhver önnur og jafnvel stærri vandamál? Eins og til að mynda skuldavanda íslenskra heimila?