Eykon sækir um leitarleyfi í Noregi

Íslenskt fyrirtæki undirbýr olíuleit í Noregi. Olíufélagið Eykon hefur sett upp tólf manna starfsstöð í Osló og sækir um leitarleyfi í norskri lögsögu í næsta mánuði. Félögin Eykon og Kolvetni ehf. sameinuðust í dag undir nafni Eykons.

Því var spáð að úthlutun olíuleitarleyfa á Drekasvæðið gæti kveikt íslenska vaxtarsprota í þessum geira en þrjú íslensk félög voru í hópi umsækjenda. Tvö þeirra runnu saman í dag, Eykon og Kolvetni, að sögn Gunnlaugs Jónssonar, sem hefur bæði verið stjórnarformaður Kolvetna og framkvæmdastjóri Eykons, en sömu aðilar hafa verið lykilhluthafar í báðum félögum. Helstu aðstandendur hins sameinaða félags eru, auk Gunnlaugs, Heiðar Már Guðjónsson, Verkfræðistofan Mannvit og Norðmaðurinn Terje Hagevang, sem stýrir nýrri starfsstöð félagsins í Noregi.

Gunnlaugur segir norska umhverfið hagstætt fyrir lítil félög en einnig sjái Eykon fyrir sér samstarf við stærri aðila og starfssvæðið er skilgreint sem allt Norður-Atlantshaf. Eykon er langt kominn með að ráða tólf manna hóp sérfræðinga til starfa í Osló til að leita á olíusvæðum Noregs. Félagið hyggst senda inn umsókn um leitar- og vinnsluleyfi í byrjun september og vonast til að fá úthlutað í janúar á næsta ári.

Í viðtali í fréttum Stöðvar 2 greindi Gunnlaugur nánar frá þessum áformum.