Valdís Þóra og Guðrún Brá deila forystunni

Það er útlit fyrir afar spennandi lokahring í kvennaflokki á Íslandsmótinu í höggleik á Korpúlfsstaðavelli.

Guðrún Brá hafði fjögurra högga forystu fyrir daginn en endaði á því að spila á 75 höggum í dag, rétt eins og í gær.

Valdís Þóra Jónsdóttir, ríkjandi Íslandsmeistari, byrjaði illa í mótinu en vann sig inn í toppbarátuna í gær. Hún gerði enn betur í dag og náði forystuna um miðbik hringsins.

Mestu munaði um fugla á 11. og 13. holu en Valdís lenti í vandræðum á 16. og varð að sætta sig við skolla. Guðrún Brá hélt rónni þrátt fyrir að missa forystuna um tíma og jafnaði metin með fugli á 18. holu.

Valdís spilaði á 70 höggum í dag, einu undir pari, og náði besta skori dagsins ásamt Sunnu Víðisdóttur sem er í þriðja sæti - tveimur höggum á eftir Valdísi og Guðrúnu.

Ólafía Þórunn Kristinsdóttir gerði um tíma atlögu að efstu konunum og náði frábærum erni á 16. holu. En hún fékk skramba strax á næstu holu á eftir og þurrkaði því örninn út.

Staðan:

1. Valdís Þóra Jónsdóttir, GL +5

2. Guðrún Brá Björgvinsdóttir, GK +5

3. Sunna Víðisdóttir, GR +7

4. Ólafía Þórunn Kristinsdóttir +9

5. Anna Sólveig Snorradóttir +11