Segir ótta um Hellisheiðarvirkjun óþarfan

Formaður umhverfis- og samgöngunefndar Alþingis segir það ekki koma á óvart að framleiðslugeta Hellisheiðarvirkjunar sé undir væntingum og óþarfi að óttast það.

Sameinginlegur fundur var haldinn í umhverfis- og samgöngunefnd og atvinnuveganefnd í morgun en umfjöllunarefnið var Hellisheiðarvirkjun. Boðað var til fundarins eftir umfjöllun Fréttablaðsins um virkjunina fyrr í mánuðinum, þar sem fram kom að framleiðslugeta virkjunarinnar væri langt undir væntingum og getu.

„Sá ótti sem menn höfðu um Hellisheiðarvirkjun var óþarfi,“ segir Höskuldur Þórhallsson, formaður umhverfis- og samgöngunefndar og bætir við að menn hafi vitað um boranir sem þurfti að fara í.

Orkuveita Reykjavíkur hefur nú til skoðunar að tengja Hellisheiðarvirkjun við háhitasvæðið í Hverahlíð til að tryggja þannig full afköst virkjunarinnar, og tekjur til næstu ára. Þetta er eitthvað sem Höskuldur segir að hafi ekki komið á óvart:

„Menn vissu það árið 2009 að ef menn færu ekki í nauðsynlegar boranir, þá yrði framleiðslan undir getu,“ segir Höskuldur.

Það hefur því verið hluti af áætlunum Orkuveitunnar að ráðast í orkunýtingu í Hverahlíð. En er það lausn sem hugnast nefndarmönnum?

„Það verður alltaf mat orkuveitunnar hvað sé best að gera, hún verður að taka sínar ákvarðanir út frá umhverfis- og efnahagslegum aðstæðum,“ segir Höskuldur að lokum.