Íslendingaliðið steinlá gegn toppliðinu

Fjórar íslenskar knattspyrnukonur voru í byrjunarliði Avaldsnes í 5-1 tapi á heimavelli gegn toppliði Stabæk í efstu deild norsku knattspyrnunnar í dag.

Guðbjörg Gunnarsdóttir þurfti að sækja boltann fimm sinnum úr neti sínu en auk hennar voru Mist Edvardsdóttir, Hólmfríður Magnúsdóttir og Þórunn Helga Jónsdóttir í byrjunarliðinu.

Stabækr komst í 2-0 eftir rúmlega tuttugu mínútna leik en heimakonur minnkuðu muninn skömmu síðar. Þrjú mörk í síðari hálfleik sáu fyrir stórsigri gestanna.

Stabæk situr í efsta sæti deildarinnar eftir níu umferðir með 25 stig. Avaldnes, sem er nýliði í deildinni, hefur 11 sig í 6. sæti.

Arna-Björnar, lið Gunnhildur Yrsu Jónsdóttur, náði í stig á útivelli gegn Röa. Leiknum lauk með markalausu jafntefli en Gunnhildur var ekki í leikmannahópi Arna-Björnar vegna meiðsla. Arna-Björnar er í 5. sæti með 12 stig.

Þá gerði Kolbotn, lið Fanndísar Friðriksdóttur, markalaust jafntefli gegn Medkila á heimavelli. Kolbotn er í þriðja sæti deildarinnar með 18 stig.