Gunnhildur og Mist á skotskónum

Landsliðskonurnar Gunnhildur Yrsa Jónsdóttir og Mist Edvardsdóttir skoruðu fyrir lið sín í bikarsigrum í gærkvöldi.

Mist kom Avaldsnes á bragðið í 4-0 útisigri á Haugar í 2. umferð norska bikarsins. Mark Mistar kom á 20. mínútu. Auk miðvarðarins voru Guðbjörg Gunnarsdóttir, Hólmfríður Magnúsdóttir og Þórunn Helga Jónsdóttir í byrjunarliði gestanna.

Arna-Bjørnar vann 2-0 heimasigur á Asane sem leikur í næstefstu deild. Gestirnir héldu í við heimakonur lengi vel en tvö mörk seint í leiknum tryggðu Arna-Bjørnar sigurinn. Gunnhildur Yrsa skoraði síðara markið eftir hornspyrnu.