Matthías tryggði Start jafntefli

Matthías Vilhjálmsson skoraði mark Start í 1-1 jafntefli á útivelli á móti Sogndal í norsku úrvalsdeildinni í fótbolta í dag. Matthías hefur þar með skorað þrjú mörk fyrir Start á þessu tímabili.

Matthías skoraði jöfnunarmarkið sitt með skalla eftir hornspyrnu á 69. mínútu leiksins en Sogndal komst í 1-0 á 33. mínútu. Matthías hafði komið inn á sem varamaður aðeins tíu mínútum áður en hann skoraði. Guðmundur Kristjánsson lék allan leikinn me Start.

Jón Dadi Böðvarsson kom inn á sem varamaður hjá Viking á 88. mínútu eða rétt áður en Trond Olsen tryggði liðinu 2-1 sigur á Tromsö. Indriði Sigurðsson lék allan leikinn í miðri vörn Viking.

Steinþór Freyr Þorsteinsson og félagar í Sandnes Ulf töpuðu 0-3 á útivelli á móti Odd. Steinþór Freyr lék allan leikinn. Sandnes Ulf lék manni færri frá 24. mínútu leiksins.