Frítt flugunámskeið fyrir 10. bekkinga

Í tilefni af 10 ára afmæli Stangveiðifélags Akureyrar (SVAK) ætlar félagið að bjóða 10. bekkingum í öllum grunnskólum Akureyrar uppá frítt fluguveiðinámskeið í júnímánuði.

Eitt af markmiðum félagsins er að efla áhuga barna og unglinga á stangveiði.

"Námskeiðin eru hluti af því að styrkja unglingastarfið hjá okkur. Við höfum verið með svona unglinganámskeið í nokkur ár, annaðhvort sjálfir eða í samstarfi við aðra," segir Sævar Örn Hafsteinsson, varaformaður SVAK.

Að sögn Sævars taka unglingarnir ágætlega í námskeiðin. "Eins og gefur að skilja eru það hins vegar foreldrarnir sem taka verst í þetta, það er að þarna sé komið enn eitt áhugamálið hjá unglingnum sem á kannski fyrir snjóbretti, trommusett eða eitthvað álíka," segir Sævar og hlær. "Annars hafa þessi námskeið fengið góða viðtöku og áhuginn fyrir þeim er mikill. Það veitir ekkert af að fá nýliðun inn í þessa blessuðu stétt."

Átta námskeið standa unglingunum til boða og hefst það fyrsta þann 1. júní næstkomandi. Meðal kennara eru Erlendur Steinar og Pálmi Gunnarsson.

Nánari upplýsingar um námskeiðið má finna á heimasíðu SVAK.