Þú þolir þetta ákveðið lengi

Útvarpskonan Kolbrún Björnsdóttir sagði starfi sínu lausu í dag eftir sex ár í morgunþættinum Í bítið á Bylgjunni vegna vinnutímans eins og lesa má hér en þátturinn er á dagskrá eldsnemma á morgnana eða klukkan 06:50.  Við höfðum samband við Siggu Lund útvarpskonu sem hefur svipaða reynslu nema á öðrum vettvangi, FM 957.

Sigga stjórnaði morgunþættinum Zúúber ásamt Sigvalda Kaldalóns og Gassa Ólafssyni lengi vel en sá þáttur var í léttari kantinum.

Kostir og gallar

,,Ég var náttúrulega í morgunþættinum Zúúber í 5 ár svo ég hef reynsluna af þessum vinnutíma en ég get ekki sagt neitt slæmt um það að byrja vinnuna eldsnemma. Þetta hefur sannarlega sína kosti og það hefur sannarlega sína galla," segir Sigga og heldur áfram:

Æðislegur tími

,,Mér persónulega fannst árin í Zúúber æðislegur tími. Það gaf mér mikið að hafa verið partur af þessu teymi á sínum tíma. Fyrir mig voru kostirnir fleiri en gallarnir.  Þú byrjar fyrr og ert því búin fyrr í vinnunni en að sjálfsögðu voru kvöldin ekki þín. Þú þurftir að fara að snemma að sofa til að allt fúnkeri sem skyldi sem var erfitt fyrir mig þar sem ég er næturhrafn að eðlisfari. Það var oft erfitt að vakna."

Gott að losna undan pressunni

,,En ég man þegar ég hætti í Zúúber fann ég hvað það var gott að losna undan pressunni að þurfa ekki að fara að sofa extra snemma og það var gott að sofa aðeins lengur," útskýrir Sigga.

Þú þolir þetta ákveðið lengi

,,En það er þannig með þetta eins og allt - þetta hefur allt sinn líftíma. Þú þolir þetta ákveðið lengi held ég. Þessi vinnutími krefst aga og í raun stimplar þú þig aldrei úr vinnunni. Þú ert alltaf með augu og eyru opin fyrir efnistökum og því sem er að gerast."

Svali sótti Siggu þegar snjóaði

,,Og eitt sem ég man. Það er ekki búið að ryðja götur svona snemma á veturna.  Það gat verið ansi erfitt að komast til vinnu um hávetur.  Svali kom stundum á jeppanum og sótti mig þegar þannig stóð á," segir Sigga þegar hún rifjar upp gömlu góðu tímana þegar hún vann með Svala og Gassa í útvarpi.

Siggalund.is