Ég er ánægð - þetta er alveg ótrúlega mikil breyting

Kristjana Jónsdóttir, eða Nanna eins og hún er oftast kölluð, er fertugur garðyrkjubóndi og þriggja barna móðir sem leitaði á náðir Kalla Berndsen þegar henni fannst kominn tími til að breyta til í útliti og klæðaburði.

„Mér finnst gaman að fara að versla með börnunum mínum, því þau hafa gaman að því. Sjálf hef ég ekki haft neinn áhuga á að versla föt á sjálfa mig,“ sagði Nanna við meistara Karl Berndsen í þáttunum Í nýju ljósi, sem eru á dagskrá Stöðvar 2 á miðvikudagskvöldum.

Nanna fékk góð ráð varðandi klæðaburð frá Kalla, sem veit betur en flestir hvað hentar hverjum í þeim efnum. Auk þess prófaði hún augnháralengingar, fékk andlitsförðun og hárgreiðslu.

Það er óhætt að segja að Kalli hafi náð að kalla fram það besta í útliti hinnar stórglæsilegu Nönnu, sem var mjög ánægð með allar breytingarnar.

„Þetta er alveg fáránlegt!“ sagði Nanna steinhissa eftir að hafa séð afraksturinn í spegli.

„Ég er ánægð með þetta, þetta er alveg ótrúlega mikil breyting. Mér finnst ég hafa lært ýmislegt, meðal annars hvernig maður dregur fram það besta."

 Þátturinn hans Kalla, Í nýju ljósi, er á dagskrá Stöðvar 2 í kvöld, miðvikudag.