Menn að búa til ótta í kosningabaráttu

„Bankarnir verða ekki seldir út úr þessum þrotabúum öðruvísi en efnahags- og viðskiptanefnd verði upplýst um það," segir Katrín Júlíusdóttir fjármálaráðherra.

Guðlaugur Þór Þórðarson, þingmaður Sjálfstæðisflokksins, og Sigmundur Davíð Gunnlaugsson, formaður Framsóknarflokksins, hafa gagnrýnt ráðherra fyrir að efnahags- og viðskiptaefnd Alþingis hafi ekki verið upplýst um gang mála við kaup á hlut erlendra kröfuhafa í Íslandsbanka og Arionbanka.

Katrín Júlíusdóttir minnir á að engar formlegar viðræður séu hafnar um sölu á eignum bankanna.

„Það hafa verið þreyfingar í gangi lengi en það eru engar formlegar viðræður hafnar enn," segir Katrín. Hún minnir á að þrotabúin heyri undir lög um gjaldeyrismál og útgreiðslu úr þeim. Finna þurfi heildarlausn en ekki taka staka bita úr þrotabúunum og selja þá.

„Við vinnum að heildarlausn því menn komast hvort eð er ekkert með þessar eignir. Ég sé ekkert fengið með því að selja banka út úr þrotabúunum en vera engu nær um hvernig kröfuhafarnir eigi að koma eignum sínum úr landi," segir Katrín.

Aðhald alla leið

Hún segir breytingu á lögum um gjaldeyrismál frá því 12. mars 2012 ástæðu þess að ríkisstjórnin hafi góð tök á málinu. Þá hafi þrotabúin verið færð undir gjaldeyrishöftin. Hún minnir á að þingmenn Framsóknarflokksins og Sjálfstæðisflokksins hafi setið hjá við þá breytingu á lögunum.

„Menn eru í ruglinu í kosningabaráttu að reyna að búa til ótta byggðan á einhverjum skáldskap. Framsóknarflokkurinn er með fljúgandi fylgi og þarf ekki að vera á þessu plani," segir Katrín. Ríkisstjórnin naut þó stuðnings Framsóknarflokks og Sjálfstæðisflokks við lagabreytingu þess efnis að Seðlabankinn gæti ekki sett reglur um útgreiðslur úr þrotabúum föllnu bankanna nema að undangengnu samráði við efnahags- og viðskiptanefnd.

„Það er aðhald alla leið þannig að það verður ekki farið framhjá lögum. Þetta fer aldrei framhjá efnahags- og viðskiptanefnd að setja þessar reglur um greiðslur út úr þrotabúunum," segir Katrín. Hún, sem fjármálaráðherra, myndi svo staðfesta reglurnar.

Mæta skilningi hjá kröfuhöfum

Þingfundum var frestað fram yfir kosningar á Alþingi í nótt. Færi svo að formlegar viðræður um sölu hæfust á meðan Alþingi er ekki að störfum yrði efnahags- og viðskiptanefnd engu að síður kölluð saman. Lögin séu skýr hvað það varðar.

Guðlaugur Þór sendi fjölmiðlum tilkynningu fyrir hönd sín og Péturs H. Blöndal, þingmanns Sjálfstæðisflokksins, í gær þar sem fram kemur að hann hafi óskað eftir að efnahags- og viðskiptanefnd yrði kölluð saman vegna hugsanlegrar sölu bankanna til lífeyrissjóðanna. Vilja þeir að fulltrúar Seðlabankans, lífeyrissjóða, slitastjórna auk fjármálaráðherra mæti á fundinn.

Katrín minnir á að virði eigna í þrotabúunum sé um 2500 milljarðar króna og bankahlutinn aðeins lítill hluti af því. Finna þurfi heildarlausn á þrotabúunum þar með talið bankahlutanum. Á þessu hafi kröfuhafar skilning.

„Það virðist vera skilningur á þessu sjónarhorni okkar af þeirra hálfu. Það er ekkert unnið í skjóli nætur. Svona lítum við á þetta og munum kynna nefndinni heildarlausnina samkvæmt lögum."