Völdu versta ökuþór síðustu 20 ára

Lesendur veftímaritsins Autosport hafa valið versta Formúlu 1 ökuþór síðustu tuttugu ára. Fyrir valinu varð Japaninn Takachiho "Taki" Inoue sem keppti í átján mótum árin 1994 og 1995 með ömurlegum árangri.

Það furðulegasta við valið var að Inoue hélt uppi mikilli kosningabaráttu á Twitter þar sem hann bað lesendur blaðsins um að kjósa sig. Inoue skildi ekki mikið eftir sig í Formúlu 1. Hann ók fyrir tvö lið, Simtek Ford og Footwork Hart, en lauk aðeins fimm mótum.

Hans besti árangur var áttunda sæti í ítalska kappakstrinum 1995. Aðeins átta luku mótinu vegna áreksturs margra bíla í upphafi mótsins. Inoue er einnig þekktastur fyrir framgöngu sína í þessu móti því þegar Damon Hill og Michael Schumacher ætluðu að hringa Inoue ók Schumacher aftan á Hill með þeim afleiðingum að báðir urðu að hætta keppni.

Annað atvik sem fékk fólk til að örvænta um hæfileika Inoue var þegar hann varð fyrir sjúkrabíl í Ungverjalandi árið 1995. Hart-vélin í Footwork-bíl hans sprakk eftir 13 hringi svo hann þurfti að leggja honum í brautarkantinum. Inoue treysti brautarvörðunum hins vegar ekki til þess að slökkva eldinn í vélarrúminu og greip sjálfur slökkvitæki. Eftirleikinn má sjá í myndbandinu hér að ofan.

Í örðu sæti í vali lesenda varð Svisslendingurinn Jean-Denis Deletraz sem ók fyrir Larrousse- og Pacific-liðin í þremur mótum árið 1994. Ekki er mikið um hann að segja nema að hann lauk einu móti af þremur, í fimmtánda sæti og síðastur.

Alex Yoong frá Malasíu varð þriðji í valinu. Hann var ömurlegur fyrir Minardi-liðið árin 2001 til 2002. Hann reyndi 18 sinnum að taka þátt í sjálfri keppninni en tókst aðeins fjórtán sinnum að komst upp úr tímatökunum. Hans besti árangur var í ástralska kappakstrinum árið 2002 þegar hann komst í mark í sjöunda sæti, næst síðastur og þremur hringjum á eftir fremsta manni.

Í fjórða sæti varð svo annar gamall Minardi-ökuþór. Argentínumaðurinn Gaston Mazzacane keppni í 21 móti og náði best áttunda sæti á Nurburgring áirð 2000. Alain Prost réð hann svo til liðs við sig árið 2001 en lét hann fara þegar fjögur mót voru liðin af vertíðinni.

Fimmti varð Giovanni Lavaggi, aðalsmaður frá Sikiley sem skráður var til leiks í tíu mótum en keppti aðeins sjö sinnum fyrir Pacific og Minardi árin 1995 og 1996. Með vonlausri frammistöðu sinni varð hann eini ökuþórinn árið 1995 til að ljúka engu móti sem hann var skráður í.