Orkuveitan kappkostar við að finna lausn á brennisteinsmengun

Orkuveita Reykjavíkur segir ekki raunhæft markmið að minnka brennisteinsmengun nærri Hellisheiðarvirkjun fyrir mitt næsta ár. Reglugerð um mengun verður stóhert næstu áramót, ítrekuð brot geta varðað fangelsisvist.

Brennisteinsmengun hefur lengi verið vandamál nærri Hellisheiðarvirkjun, en til stendur að herða reglugerð um leyfileg mörk brennisteinsmengunar. Hingað til hafa mörkin verið 150 míkrógrömm í rúmmeter, en þau lækka niður í fimmtíu næstu áramót. Hólmfríður Sigurðardóttir, umhverfisstjóri segir það ekki raunhæft markmið að ná að lækka mengun frá virkjuninni fyrir þann tíma en það verði haldið áfram með tilraunaverkefni sem miða að því að draga úr mengun.

Það voru bæjarfulltrúar Kópavogs, þeir Ómar Stefánsson, Framsóknarflokknum, og Gunnar I. Birgisson, Sjálfstæðisflokknum, sem vöktu athygli á málinu en í bókun sem þeir lögðu fram á fundi framkvæmdarráðs í gær krefjast þeir þess að Orkuveitan bregðist sem fyrst við. Hólmfríður segir að Orkuveitan hafi lengi reynt að finna lausn á vandamálinu, en það hefur gengið hægt.

Nú er svo komið að Orkuveitan hefur óskað eftir undanþágu frá umhverfisráðuneytinu vegna málsins, enda liggja sektir við broti á reglugerðinni. Séu brotin ítrekuð og alvarleg liggur allt að fjögurra ára refsing við brotinu.

Ráðuneytið hafnaði þessari viðleitni, en hvatti Orkuveituna til þess að halda áfram þróun á lausnum á þessu vandamáli.

Í Lækjarbotnum, sem tilheyra Kópavogi, er leik- og grunnskólinn Waldorf. Aðspurð hvort brennisteinsmengunin sé hættuleg heilsu fólks svarar Hólmfríður því til að rannsóknir séu misvísandi hvað þetta varðar. Ein rannsókn í Nýja Sjálandi kemst að þeirri niðurstöðu að mengunin hafi tiltölulega lítill sem engin áhrif. Nýleg íslensk rannsókn sýnir aftur á móti að brennisteinsmengunin hafi áhrif á viðkvæm öndunarfæri fólks sem er til að mynda með astma.