Tiger spilaði golf með Bandaríkjaforseta

Það er allt á uppleið hjá Tiger Woods þessa dagana eftir afar erfiða tíma síðustu ár. Hann er farinn að spila eins og maður á nýjan leik og fékk svo tækifæri um helgina til þess að spila hring með Barack Obama Bandaríkjaforseta. Þetta er í fyrsta skipti sem Obama og Tiger spila golf saman.

Þeir léku saman í Flórída á laugardag. Með í hollinu voru Jim Crane, eigandi hafnaboltaliðsins Houston Astros, og Ron Kirk, fyrrum borgarstjóri í Dallas.

Forsetaskrifstofan vildi ekki gefa neitt upp um golfhringinn.

Forsetinn tók hringinn þó alvarlega því hann æfði með Butch Harmon, fyrrum þjálfara Tiger, daginn fyrir hringinn með Woods.