Útlán ÍLS dragast áfram saman

Almenn útlán Íbúðalánasjóðs í júlí voru fimmtungi lægri en á sama tíma í fyrra, að því er lesa má úr nýrri mánaðarskýrslu sjóðsins. Þá kemur fram hjá Greiningu Íslandsbanka að útlánin séu fjórðungi minni fyrstu sjö mánuði ársins en á sama tíma 2012 og innan við helmingur tímabilsins 2011.

Í mánaðarskýrslunni kemur fram að heildarútlán sjóðsins í síðasta mánuði hafi numið 1,1 milljarði króna. Þar af hafi 800 milljónir verið vegna almennra lána. Þá kemur fram að meðalfjárhæð almennra lána hafi í mánuðinum verið 10,2 milljónir króna.

Vanskil hjá sjóðnum lækka lítillega milli mánaða samkvæmt skýrslunni. Alls voru 8,95 prósent heimila sem eru með fasteignalán sín hjá Íbúðalánasjóði með lánin í vanskilum í lok júlí 2013.

Þá kemur fram að vanskil eða frystingar nái samtals til 14,37 prósenta lánasafns sjóðsins. Í júlí í fyrra var það hlutfall 15,97 prósent.

Sömuleiðis kemur fram að í lok júlí hafi Íbúðalánasjóður átt að fullu 2.578 eignir um land allt og hafi þeim fjölgað um 35 frá fyrri mánuði.

„Rétt rúmlega helmingur fasteigna sjóðsins var áður í eigu byggingaraðila, fyrirtækja í leiguíbúðarekstri eða annarra lögaðila, en tæpur helmingur eignanna var áður í eigu einstaklinga.“

Í umfjöllun Greiningar Íslandsbanka er bent á að í landinu öllu hafi í árslok 2011 verið ríflega 131 þúsund íbúðir. Því láti nærri að tvö prósent íbúða landsins séu nú komin í eigu Íbúðalánasjóðs.

„Íbúðum í eigu sjóðsins fjölgaði um 350 frá áramótum til júlíloka, eða um tæplega 16 prósent. Raunar er athyglisvert að vanskilahlutfallið hafi ekki lækkað meira í ljósi þessa,“ segir í umfjöllun Greiningar.

Af þeim 2.578 eignum sem Íbúðalánasjóður átti í lok júlí hafi 2.109 eignum verið ráðstafað í útleigu, sölumeðferð eða annað.

„Þá biðu 469 eignir frekari greiningar. Margar þeirra eru á svæðum þar sem nokkurt offramboð er af eignum til sölu og/eða leigu,“ segir í skýrslu sjóðsins.