NBA í nótt: Tvær flautukörfur hjá Johnson

NBA-deildin í körfubolta fór aftur af stað í nótt eftir hlé sem var gert vegna stjörnuhelgarinnar. Níu leikir voru á dagskrá gærkvöldsins.

Brooklyn Nets vann ótrúlegan sigur á Milawukee, 113-111, í framlengdum leik. Joe Johnson, leikmaður Brooklyn, átti stóran þátt í sigrinum.

Johnson jafnaði leikinn í lok venjulegs leiktíma með þriggja stiga flautukörfu. Hann tryggði svo sínum mönnum sigurinn með annarri flautukörfu í framlengingunni, þótt ótrúlega megi virðast.

Alls skoraði hann 24 stig í leiknum en þeir Brook Lopez og Deron Williams komu næstur með nítján hvor. Nets hafði tapað þrettán leikjum í röð gegn Milwaukee fyrir leik liðanna í nótt.

Brandon Jennings átti stórleik fyrir Milwaukee og skoraði 34 stig. Ersna Ilyasova var með 21 stig.

Besta lið deildarinnar, San Antonio, hélt uppteknum hætti og vann Sacramento, 108-102. Tony Parker var með 30 stig og ellefu stoðsendingar í leiknum en þetta var fimmtándi sigur liðsins í síðustu sextán leikjum þess.

San Antonio hefur unnið 43 leiki af 55 til þess og er einnig með bestan árangur á útivelli, þar sem liðið hefur unnið 21 leik af 31.

Ekkert gengur hjá Golden State sem tapaði sínum sjötta leik í röð í nótt, í þetta sinn fyrir Utah, 115-101. Al Jefferson var með 24 stig fyrir Utah og Gordon Hayward sautján.

Úrslit næturinnar:

Washington - Toronto 88-96

Orlando - Charlotte 92-105

Brooklyn - Milwaukee 113-111

Detroit - Memphis 91-105

New Orleans - Chicago 87-96

Denver - Boston 97-90

Utah - Golden State 115-101

Sacramento - San Antonio 102-108

Phoenix - Portland 102-98