Guðmundur Ágúst: Ég vildi meira

Guðmundur Ágúst Kristjánsson spilaði vel á Íslandsmótinu í höggleik í dag og var nálægt dagsgömlu vallarmeti Ólafs Björns Loftssonar.

„Ég vildi meira eftir að hafa verið sex undir eftir tólf holur,“ sagði hann við Vísi en viðtalið má sjá í heild sinni hér fyrir ofan. Guðmundur Ágúst spilaði á fimm höggum undir pari í dag og er samtals á tveimur höggum yfir pari í 11.-13. sæti.

Hann var þó ekkert allt of sáttur við hringinn í dag. „Ég var betri að pútta í gær og sló miklu betur. Ég fékk fjóra gefins fugla og nánast gefins örn í dag.“

„En spilamennskan fer batnandi í mótinu og það er jákvætt. Ég er að spila frekar pressulaus og ég ætla að gefa allt í þetta á morgun.“