Æfingalaus körfuboltadómari stimplaði sig inn í toppbaráttuna

Kristinn Óskarsson hefur komið skemmtilega á óvart á fyrstu tveimur keppnisdögunum á Íslandsmótinu í höggleik í golfi. Kristinn, sem er betur þekktur sem einn reyndasti körfuknattleiksdómari landsins er þegar þetta er skrifað í efsta sæti mótsins ásamt fleiri kylfingum. Kristinn, sem leikur fyrir GS, er með 1,3 í forgjöf, hefur leikið báða hringina á Strandarvelli á Hellu á 1 höggi undir pari vallar.

„Ég kann vel við þessa tölu enda er þetta fæðingarárið mitt, 1969," sagði Kristinn rétt eftir að hann hafði lokið við að skila skorkortinu. Kristinn æfir ekki golf, hann spilar það bara.

„Ég fór síðast á alvörugolfæfingu fyrir fjórum árum," sagði Kristinn en hann hafði það að markmiðið að komast í hóp þeirra 72 kylfinga sem fá að halda áfram næstu tvo keppnisdagana.

„Miðað við forgjöfina þá var ég í 35. sæti á þeim lista og ég hafði einsett mér það að leika á forgjöfinni og vera í kringum 30. sætið. Ég náð að lækka forgjöfina aðeins í sumar, það gekk vel í meistaramótinu, enda er Hólmsvöllur í Leiru frekar varnarlítill í svona þurrki sem hefur verið í sumar. Pútterinn hefur verið að virka að undanförnu, en hann er ekki mín uppáhaldskylfa að öllu jöfnu," bætti Kristinn við. Hann á alveg eins von á því að mæta bara í körfuboltadómarabúningnum á morgun.

„Ég held að það séu allir að bíða eftir því að ég „springi" og ætli ég sé ekki einn af þeim líka. Ég er vanur því að umgangast toppíþróttamenn og þá er í dómarabúningnum og líður rosalega vel. Kannski verður þetta bara lausnin. Ég veit ekki hvort ég má það þar sem hann er allur í auglýsingum."

Kristinn býst alveg eins við því að vera með fiðring í maganum þegar hann mætir á teig á laugardaginn. „Ég verð örugglega stressaður en ég ætla að vinna í því með því að leggja parket í sumarbústaðnum í kvöld," sagði Kristinn Óskarsson.