Regluverk stöðvar ekki áhættusækni bankanna

Dr. Jakob Ásmundsson, framkvæmdastjóri fjármála og rekstrar hjá fjárfestingabankanum Straumi, mælir eindregið með því að skilið verði á milli viðskiptaarms og fjárfestingaarms íslensku bankanna. Í aðsendri grein í Fréttablaðinu og Vísi í dag lýsir hann ókostum þess að íslensku viðskiptabankarnir stundi fjárfestingabankastarfsemi samhliða.

Jakob segir að viðskiptamódel íslensku bankanna sé það sama og það var fyrir hrun. „Þeir voru, og eru enn, í senn viðskiptabankar og fjárfestingabankar," segir hann. Samanlögð stærð þeirra nemur um tvöfaldri landsframleiðslu þjóðarinnar og því hefði fall eins þeirra í för með sér gífurlegan kostnað fyrir þjóðina.

Í greininni segir Jakob að fjárfestingabankastarfsemi samhliða viðskiptabankastarfsemi hafi í för með sér freistnivanda og hegðun sem ekki er hægt að stöðva með reglum eða auknu eftirliti. Hann segir viðskiptabanka í dag stunda áhættusamar lánveitingar til að styðja við fjárfestingabankastarfsemi sína. „Lög, reglur og eftirlit munu aldrei ná að koma í veg fyrir freistnivanda ef freistingin er til staðar á annað borð," segir hann.

Viðskiptabankarnir hafa lýst því yfir að þeir hyggist auka fjárfestingabankastarfsemi sína verulega á næstu árum. Jakob telur að aðskilnaður milli fjárfestingabankastarfsemi og viðskiptabankastarfsemi muni leiða til minni áhættusækni. Hann spyr: Er ekki lag að aðskilja nú, í stað þess að bíða þar til það verður dýrt og erfitt í framkvæmd, eða jafnvel of seint? Svarið virðist augljóst.