Vilja renna þriðju stoðinni undir fjármálakerfið og hagstjórnina

Nauðsynlegt er að innan þriggja ára myndi Fjármálaeftirlitið og Seðlabankinn eina samþætta stofnun, sem þjóni sem peningastefnu- og fjármálastöðugleikastofnun þjóðarinnar. Þetta er mat sérfræðingahóps sem efnahags- og viðskiptaráðherra skipaði í mars til þess að vinna tillögur um samræmda heildarumgjörð laga og reglna um alla starfsemi á fjármálamarkaði. Hópurinn kynnti niðurstöður sínar í morgun.

Jón Sigurðsson, fyrrverandi stjórnarformaður Fjármálaeftirlitsins, kynnti niðurstöðurnar í dag en hann átti sæti í sérfræðingahópnum ásamt Gavin Bingham, fyrrverandi framkvæmdastjóra Alþjóðagreiðslubankans í Basel, og Kaarlo Jännäri, fyrrverandi framkvæmdastjóra fjármálaeftirlits Finnlands.

Jón sagði að veilur í eftirliti og regluverki með fjármálastarfsemi væru einkum þrjár. Heildareftirliti sé ábótavant, ekki sé nógur gaumur gefinn í Fjármálaeftirlitnu að „alvarlegum hagsmunaárekstrum og þeim brengluðu hvötum og hvatakerfum sem gegnsýra fjármálastarfsemina í öllum löndum," eins og hann orðaði það. Þá sé heldur ekki gætt nægjanlega vel fyrirfram að því að það sé auðveldað að gera upp, endurskipuleggja eða slíta fjármálafyrirtækjum sem hafa lent í alvarlegum fjárhagsvanda. „Það þarf að koma í veg fyrir, eftir því sem tök eru á, að áföll í einu fjármálafyrirtæki valdi víðtækari vanda," sagði Jón.

Auk þess að færa FME inn í eina stofnun vill sérfræðingahópurinn stofna sérstakan samráðsvettvang, fjármálastöðugleikaráð sem á að sjá um mótun fjármálastefnu. Þá vill hópurinn að framkvæmd allra laga um fjármálastarfsemi og stofnanir sem henni tengjast verði færðar undir sama ráðuneyti.

Sjá má skjal með meginniðurstöðum skýrslunnar, hér.