Misskipting eigna heimilanna hefur aukist verulega

Tölur benda til þess að misskipting eigna meðal íslenskra heimila hafi aukist verulega frá hruninu haustið 2008.

Greining Arion banka fjallar um málið í Markaðspunktum sínum en þar segir að eitt augljósasta merkið um þessa þróun sé eignarskattstofn heimilanna. Í dag eiga um 60% heimilanna jákvæðan eignarskattstofn. Síðustu 10 ár hefur skiptingin hinsvegar verið á þá vegu að um 80% heimila áttu jákvæðan eignarstofn en 20% fjölskyldna voru með neikvæðan stofn.

Þessi 20% voru líkast til að verulegu leyti ungt fólk sem var að koma undir sig húsaskjóli í fyrsta sinn, en um 20% þjóðarinnar hefur alla jafnan verið á aldrinum 18-32 ára. Hlutfall heimila með neikvæðan eignarskattstofn hefur nú tvöfaldast úr 20% í 40%. Ljóst er að það er ekki vegna aukins hlutfalls ungra fjölskyldna sem hefja heimilishaldið oft með lán á bakinu. Ástæðuna fyrir þessu er að finna í fasteignabólunni sem varð á árunum fyrir hrun og að allt loft fór úr henni eftir hrunið.