NBA í nótt: Lakers vann eftir að Brown var rekinn

LA Lakers vann í nótt sigur á Golden State, 101-77, aðeins nokkrum klukkustundum eftir að þjálfarinn Mike Brown var rekinn frá félaginu. Hann var aðeins átján mánuði í starfi.

Lakers var stýrt af Bernie Bickerstaff sem mun þó aðeins gegna starfi þjálfara þangað til að nýr verður ráðinn.

Liðið lenti í basli í fyrri hálfleik en stakk svo af í þeim síðari með 25-9 spretti í þriðja leikhluta. Kobe Bryant fór fyrir sínum mönnum á þeim kafla en hann skoraði alls 27 stig og var með níu fráköst og sjö stoðsendingar í leiknum. Pau Gasol var með fjórtán stig og sextán fráköst.

Lakers hefur nú unnið tvo leiki á tímabilinu en tapað fimm. Áhorfendur létu vilja sinn í ljós á leiknum og hrópuðu „Við viljum Phil". Þar var átt við Phil Jackson, fyrrum þjálfara liðsins sem hefur unnið alls ellefu meistaratitla á ferlinum.

Mitch Kupchak, framkvæmdarstjóri liðsins, viðurkenndi eftir leik að Jackson væri ofarlega á óskalista hans.

Meðal úrslita annarra leikja má nefna að New York Knicks vann Dallas, 104-94, og hefur þar með unnið alla fjóra leiki sína í upphafi tímabilsins. Er það besta byrjun liðsins í meira en 20 ár. Carmelo Anthony skoraði 31 stig fyrir Knicks.

Úrslit næturinnar:

Washington - Milwaukee 91-101

Orlando - Brooklyn 68-107

Boston - Philadelphia 100-106

NY Knicks - Dallas 104-94

Atlanta - Miami 89-95

Memphis - Houston 93-85

New Orleans - Charlotte 107-99

Oklahoma City - Detroit 105-94

Minnesota - Indiana 96-94

Phoenix - Cleveland 107-105

Sacramento - San Antonio 86-97

Denver - Utah 104-84

LA Lakers - Golden state 101-77