Varðskipið Þór senn á heimleið

Reiknað er með að varðskipið Þór verði afhent Landhelgisgæslunni í vikunni og verði þá siglt heim til Íslands. Þór hefur verið í Bergen í Noregi frá 9. febrúar síðastliðinn þar sem skipt var um gallaða aðalvél í skipinu.

Þór fór í prufusiglingu á laugardag frá Bergen þar sem gerðar voru titrings-, eldsneytis- og hraðamælingar. Rolls Royce í Noregi skipti um aðra aðalvél skipsins vegna titrings sem mældist í skipinu eftir að það kom til Íslands síðastliðið haust og er þessi framkvæmd öll á ábyrgð Rolls Royce og ber Landhelgisgæslan ekki neinn kostnað af framkvæmdunum, og ábyrgðartími véla og skips lengist sem nemur framkvæmdatímanum.

Siglingin sem stóð yfir í um 12 klukkustundir gekk vel að sögn skipherra. Enginn óeðlilegur titringur mældist í siglingunni og virðist sem ganghraði varðskipsins hafi aukist frá því sem áður var því hann mældist 20,1 sjómílur en áður mældist hann 19,45 sjómílur. Síðastliðna daga hefur áhöfn varðskipsins jafnframt setið ýmis námskeið sem tengjast búnaði skipsins. - shá