"Fyrir suma er kreppan rétt að byrja“

„Það er algert rugl" að okkar Íslendinga bíði betri tímar fjárhagslega að mati Guðmundar Ólafssonar, hagfræðings. Í viðtali við Reykjavík Síðdegis á Bylgjunni segir hann að fyrir suma sé kreppan bara rétt að byrja.

Guðmundur segir að lánstraust Íslendinga sé í algeru lágmarki eftir kreppuna og það sé mjög neikvætt. „Það sem er stórhættulegt fyrir okkur er að fjárfestingar hafa algerlega hrunið," segir hann. Fjárfestingar í dag séu notaðar til að byggja upp atvinnulíf í framtíðinni og því sé stöðnun núna ávísun á vandræði síðar.

Maður getur fengið fjármagn eftir þremur leiðum að sögn Guðmundar. Við getum í fyrsta lagi fengið það að láni hjá útlendingum. Það telur hann ekki fýsilegt sem stendur. Í öðru lagi getum við fengið útlendinga til að koma til landsins og eiga hluti í íslenskum fyrirtækjum. „Mér sýnist að Íslendingar séu ekki mjög hrifnir af því að útlendingar séu að eiga einhverja eyðifláka uppi á fjöllum," segir hann. Og þá kemur í þriðja lagi aðeins til greiða að eiga peninga sjálfir. „Og við eigum ekkert af þeim," segir hann.

„Þannig að við erum að sigla yfir í alveg skelfilega hluti," segir hann og telur það versta við ástandið að um þessar mundir hrópa ýmsir ábyrgir menn húrra fyrir ástandinu og telja okkur trú um að nú sé komið borð fyrir báru.

Þessi húrrahróp telur Guðmundur að hluta til innantóman áróður. „Ríkisstjórnin er bara að undirbúa næstu kosningar. Það er ár í þær og nú er allt kapp lagt í að hrópa húrra fyrir sjálfum sér," segir hann.

Í lok viðtalsins víkur Guðmundur nokkrum orðum að gjaldmiðli landsins. „Í guðanna bænum, losum okkur við krónuna. Tökum upp mynt sem eitthvað vit er í. Við erum í gjaldeyrisfangelsi. Og hvað þýðir það? Bara að það er verið að fresta skellinum," segir hann að lokum.