Jólin

Dýfist í mjólk - Rúsínukökur ömmu

Svavar Knútur Kristinsson tónlistarmaður bakar rúsínukökur Svövu ömmu sinnar á jólum og dýfir í mjólk.
Svavar Knútur Kristinsson tónlistarmaður bakar rúsínukökur Svövu ömmu sinnar á jólum og dýfir í mjólk. MYND/VILHELM
„Rúsínukökurnar eru í uppáhaldi af því að pabbi heitinn bakaði þær alltaf á jólunum og þær tengjast öllum fallegu minningunum um hann. Að dýfa rúsínuköku í mjólkurglas um miðja nótt yfir Lord of the Rings-maraþoni er algerlega málið," segir Svavar Knútur Kristinsson tónlistarmaður um uppáhaldssmákökurnar sínar.

„Ég baka rúsínukökurnar eiginlega bara kringum jólin, en þó eru þær líka alveg yndislegar að eiga til að hugga vini eða ættingja sem koma í heimsókn á bömmer.

Jólastress er ekki vinsælt á mínu heimili og ekki heldur íburður. Við fjölskyldan förum til Akureyrar um jólin og verðum hjá tengdaforeldrum mínum.

Tengdamamma er listakokkur og kann að kitla bragðlaukana á fjölskyldunni. Um áramótin verðum við á Djúpavík á Ströndum. Það er svo miklu betra að skjóta upp þremur litlum rakettum með góðum vinum því tíu litlir flugeldar gera svo miklu meira í dimmum firði á Ströndum en 300 tonn af tertum og risabombum í rakettu-Reykjavík."

- rat

Rúsínukökur Svövu ömmu

2 bollar haframjöl

2 ½ bollar hveiti

1 bolli (200 g) mjúkt smjörlíki/smjör (smjör trompar allt)

2 bollar sykur með íblönduðum 2 kúfuðum msk. púðursykri

1 bolli hakkaðar rúsínur

2 egg

lyftiduft á hnífsoddi

Þurrefnum er blandað saman, svo smjörlíkinu og síðast eggjum og rúsínum.

Deigið er hnoðað þar til það er orðið fallegur massi.

Svo eru búnar til lengjur og þær látnar kólna í ísskápnum þar til þær eru stífar.

Eftir smá tíma í ísskápnum eru lengjurnar skornar í hæfilegar kökur, skellt á bökunarpappír og bakað við 200 gráður, eitthvað kringum 9 mínútur.






×