Keppt í ávöxtun á markaði

„Markmiðið er að stuðla að bættu fjármálalæsi og auknum skilningi á ávöxtunarmöguleikum," segir Páll Harðarson, forstjóri NASDAQ OMX-kauphallarinnar á Íslandi, um Ávöxtunarleikinn sem hefst formlega á mánudaginn.

Þátttakendur keppa í ávöxtun gervipeninga, svokallaðra Keldukróna, en leikurinn verður aðgengilegur á Vísi.is þar sem fram fer skráning í leikinn. Keldan er eigandi og rekstraraðili leiksins en hann er samstarfsverkefni Vísis, VÍB eignastýringarþjónustu Íslandsbanka, Kauphallarinnar og Libra. Leikurinn verður meðal annars nýttur í námskeiðahaldi á vegum VÍB, og verður kynning á leiknum á fundi á vegum VÍB klukkan 17:00 á þriðjudaginn.

Þátttakendur fá 10 milljónir Keldukróna við upphaf leiksins og reyna síðan að ávaxta féð sem best með þeim fjárfestingamöguleikum sem eru fyrir hendi. Þannig geta þátttakendur fjárfest í hlutabréfum, skuldabréfum, sjóðum rekstrarfélaga og gjaldeyri, og reynt að ávaxta krónur sínar sem best, en ávöxtun eigna er bundin við raunbreytingar á markaði.

„Keldan vill stuðla að vel ígrunduðum ákvörðunum í íslensku viðskiptalífi, með góðri yfirsýn yfir allt sem skiptir máli í efnahagslífinu. Leikurinn er liður í því starfi og er virkilega spennandi og skemmtilegt verkefni," segir Friðrik Guðjónsson, framkvæmdastjóri Keldunnar.

Vegleg verðlaun eru í boði fyrir þann sem skilar bestu ávöxtun þegar keppnin verður gerð upp næsta vor. Vinningar fyrir sigurvegara keppninnar eru m.a. ferð fyrir tvo til New York og 200.000 krónur í sjóðum hjá VÍB. Jafnframt verða veitt verðlaun til hástökkvara mánaðarins hverju sinni, út keppnistímabilið.

Hægt verður að keppa í einstaklings- og liðakeppni, og verður leikurinn vel tengdur við samfélagsmiðilinn Facebook.

„Við í Kauphöllinni erum afskaplega ánægð með Ávöxtunarleikinn. Hann rímar vel við átakið okkar „Mótum framtíðina“ en þar leggjum við mikla áherslu á fræðslu um markaðinn og virkni hans, ekki síst á meðal ungs fólks. Þarna fá þátttakendur gott tækifæri til að prófa sig áfram í viðskiptum með verðbréf ásamt því að fræðast um réttindi og skyldur sínar sem fjárfestar. Við vonumst til að geta kynnt fyrir þátttakendum hvernig markaðurinn geti nýst sem hluti af áformum um ávöxtun á sparifé til framtíðar,“ segir Páll Harðarson.

Facebook síða leiksins er aðgengileg hér.