Húsasmiðjan á að skila arði 2013

Inni í rekstrartölum Húsasmiðjunnar fyrir árið 2011 eru verulegar fjárhæðir sem tilheyra endurskipulagningu félagsins í aðdraganda söluferlis á því, að sögn Sigurðar Arnars Sigurðssonar, forstjóra Húsasmiðjunnar. Hann segir uppgjörið því gefa ranga mynd af rekstri félagsins.

Greint var frá því í gær í Markaðnum, fylgiblaði Fréttablaðsins um viðskipti og efnahagsmál, að Húsasmiðjan hefði tapað 1,6 milljarði króna í fyrra. Rekstur hennar var seldur til Bygma A/S í byrjun árs 2012 og rekstrareignir og skuldir upp á 2,5 milljarða króna færðar í nýtt félag.

Uppgjörið sem greint var frá í gær var því „gömlu“ Húsasmiðjunnar, sem í dag heitir Holtavegur 10 ehf. Sigurður Arnar segir að óvænt krafa frá skattstjóra upp á tæplega 700 milljónir króna og einskiptiskostnaður vegna niðurfærslu á birgðum, kröfum og uppgjöri á leigusamningum samtals upp á tæplega 400 milljónir króna hafi skipt verulegu máli í uppgjöri félagsins í fyrra. „Til viðbótar var umtalsverður kostnaður vegna söluferlis allur gjaldfærður í rekstrarreikningi síðasta árs og er niðurstaða hans því ekki lýsandi fyrir raunverulegan rekstrarárangur ársins 2011.“

Hann segir rétt að minna á að í lok árs 2009 hafi rekstrarhorfur Húsasmiðjunnar í óbreyttri mynd verið mjög slæmar. Þá hafi verið hafist handa við endurskipulagningu félagsins sem lauk að mestu í árslok 2011 þegar Bygma keypti Húsasmiðjuna fyrir 3,3 milljarða króna. „Í áætlunum er gert ráð fyrir að rekstur Húsasmiðjunnar skili nýjum eigendum hagnaði á árinu 2013. Rekstur Húsasmiðjunnar er því kominn á rétta braut með nýjum áherslum og sterkum bakhjarli með eignarhaldi BYGMA A/S.“ -þsj