Innlent

Telja leka Gunnars til fjölmiðla vera einstakt tilfelli

Gunnar Andersen taldi Guðlaug Þór Þórðarson hafa látið Kastljós hafa gögn um sig. Nú hefur Gunnar verið ákærður fyrir að hafa látið DV hafa gögn um Guðlaug Þór.
Gunnar Andersen taldi Guðlaug Þór Þórðarson hafa látið Kastljós hafa gögn um sig. Nú hefur Gunnar verið ákærður fyrir að hafa látið DV hafa gögn um Guðlaug Þór. fréttablaðið/gva
FME og Landsbankinn létu kanna hvort upplýsingaleki sem leiddi til ákæru Gunnars Andersen hefði verið einstakt tilfelli. Niðurstaða beggja var að svo sé. Starfsmaður Landsbankans er enn í ótímabundnu leyfi.



Fjármálaeftirlitinu (FME) er ekki kunnugt um að Gunnar Andersen, fyrrum forstjóri þess, hafi lekið trúnaðargögnum um fjármál einstaklinga eða fyrirtækja til fjölmiðla eða annarra aðila nema í einu tilviki sem var kært til lögreglu. Það mál snýst um að Gunnar er talinn hafa fengið starfsmann Landsbankans til að afla gagna um fjármál alþingismannsins Guðlaugs Þórs Þórðarsonar sem síðan var komið til DV. Landsbankinn telur einnig að um einstakt tilfelli hafi verið um að ræða.



Fréttablaðið greindi frá því í gær að Gunnar og umræddur starfsmaður Landsbankans hafa verið ákærðir fyrir brot á þagnarskyldu með því að brjóta bankaleynd vegna málsins. Gunnar hefur auk þess verið ákærður fyrir brot í opinberu starfi. Samkvæmt upplýsingum Fréttablaðsins hefur sakborningunum enn ekki verið birt ákæran, sem var gefin út um miðjan júlí. Brot á þagnarskyldu getur varðað allt að þriggja ára fangelsi. Ekki náðist í Gunnar Andersen við vinnslu fréttarinnar. Samkvæmt upplýsingum Fréttablaðsins er hann staddur erlendis.



Í svari FME við fyrirspurn Fréttablaðsins um hvort úttekt eða rannsókn hafi farið fram innan stofnunarinnar á því, hvort fleiri dæmi um upplýsingaleka á borð við þann sem Gunnar er ákærður fyrir hafi átt sér stað, segir að svo sé ekki. „Umræddur upplýsingaleki varð ekki innan Fjármálaeftirlitsins, gögn tengd honum hafa aldrei verið í vörslu stofnunarinnar. Hann tengist því ekki almennri starfsemi Fjármálaeftirlitsins. Við leggjum áherslu á að strangar öryggisreglur eru í gildi um meðferð gagna innan stofnunarinnar til að tryggja öryggi við meðferð þeirra. Okkur er ekki kunnugt um annað tilvik en það sem þú nefnir og kært var til lögreglu,“ segir í svari eftirlitsins.



Starfsmaður Landsbankans sem hefur verið ákærður er í ótímabundnu leyfi. Því hefur ekki verið breytt. Samkvæmt upplýsingum frá Landsbankanum var farið yfir málið þegar það kom upp.



Að lokinni þeirri athugun var það niðurstaða bankans að um einstakt tilfelli hefði verið að ræða þar sem viðkomandi starfsmaður hefði sýnt mikinn dómgreindarskort.

thordur@frettabladid.is

Tengd skjöl



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.