Bræðurnir munu tapa Bakkavör

Bakkavör Group, móðurfélag rekstrarfélagsins Bakkavarar, mun breyta kröfum sínum á félagið í nýtt hlutafé á næstu dögum. Umbreytingin á sér stað rúmum tveimur árum fyrr en upphaflega var áætlað.

Bræðurnir Lýður og Ágúst Guðmundssynir áttu að geta eignast allt að 25 prósent í félaginu sem þeir stofnuðu, ef tækist að greiða kröfuhöfum fyrir mitt ár 2014. Nú er ljóst að þeir munu tapa allri eign sinni í Bakkavör Group.

Stærstu eigendur félagsins eru Arion banki, skilanefnd Glitnis, Lífeyrissjóður starfsmanna ríkisins, Gildi lífeyrissjóður og Lífeyrissjóður verzlunarmanna. Heildarfjárhæð skulda Bakkavar Group nam um 64 milljörðum króna við gerð nauðasamnings félagsins fyrir um tveimur árum.

Bakkavör Group endurfjármagnaði lán dótturfélaga sinna í byrjun síðasta árs með því að gefa út 350 milljónir punda, 71,5 milljarða króna, skuldabréfaflokk og fá sambankalán upp á 380 milljónir punda, 77,7 milljarða króna. Skuldabréfaflokkurinn er á gjalddaga í febrúar 2018 en sambankalánið um mitt ár 2014. - þsj