Gæti falið í sér milljarða ávinning fyrir sjóðina

Lífeyrissjóðirnir munu fara fram á að dómskvaddir matsmenn verði fengnir til að leggja mat á það hvort gögn sem lögð voru fram í umdeildu skuldabréfaútboði Glitnis í mars 2008 hafi endurspeglað raunverulega stöðu bankans. Sjóðirnir vilja meina að þeir hafi verið blekktir til að kaupa víkjandi skuldabréf í útboðinu fyrir samtals 10,7 milljarða króna og hafa stefnt slitastjórn Glitnis vegna þessa. Undirbúningur að málarekstrinum hefur staðið yfir mánuðum saman.

Ef fallist verður á málatilbúnað lífeyrissjóðanna gæti ávinningur þeirra orðið umtalsverður. Verði skuldabréfin flokkuð sem almenn krafa, líkt og þau eru nú, munu sjóðirnir líkast til ekki fá nema um fjórðung greiddan fyrir þau miðað við væntar endurheimtur í þrotabúi Glitnis. Takist að fá skuldabréfin viðurkennd til skuldajöfnunar nýtist hins vegar mun meira af virði þeirra.

Það væri þá hægt að nota bréfin til skuldajöfnunar gegn tapi á gjaldmiðlavarnarsamningum. Tap íslenskra lífeyrissjóða vegna þeirra gæti orðið rúmlega 70 milljarðar króna eftir skuldajöfnun eins og staðan er í dag ef ýtrustu kröfur þrotabúa föllnu bankanna verða samþykktar. Tap sjóðanna vegna samninganna er bókfært á 36,4 milljarða króna í skýrslu úttektarnefndar sem birt var síðastliðinn föstudag. Þar er miðað við uppgjör á gengisvísitölunni 175. Hvorki skilanefnd Kaupþings né Glitnis hafa fallist á uppgjör á þeim forsendum.- þsj