Vilja taka upp viðræður við ríkið á ný

Lífeyrissjóðirnir hafa enn áhuga á viðræðum við ríkið um aðkomu þeirra að Landsvirkjun.

Oddný G. Harðardóttir fjármálaráðherra hefur sagt koma til greina að sjóðirnir kæmu að fjármögnun einstakra verkefna gegn því að eignast hlut í Landsvirkjun sem þeir gætu þó ekki verslað með. „Til dæmis ef þeir vildu koma inn með áhættufé. Þeir gætu þá átt hlut og tekið til sín arð," sagði hún í viðtali í Fréttablaðinu.

„Hún er þá að tala um einhvers konar B-bréf," segir Arnar Sigurmundsson, formaður Landssamtaka lífeyrissjóða, og kveður lífeyrissjóðina opna fyrir því að hefja að nýju viðræður við ríkið um aðkomu þeirra að Landsvirkjun eða jafnvel öðrum fyrirtækjum í ríkiseigu.

Til skoðunar var að lífeyrissjóðirnir keyptu sig inn í Landsvirkjun og slyppu á móti við sérstaka tímabundna skattlagningu, en ekki náðist saman í þeim viðræðum. „En á síðara stigi kom inn í viðræðurnar að skynsamlegt gæti verið að breyta Landsvirkjun í hlutafélag, sem þá yrði væntanlega með tvenns konar ákvæðum. Annars vegar væri ríkið með eignarhluta og svo hugsanlega aðrir sem væru heftir þannig að þeir gætu aldrei selt nema innbyrðis í sínum hópi," segir Arnar, en áréttar að um þetta hafi ekki farið fram neinar formlegar viðræður.

„Auðvitað væru lífeyrissjóðirnir örugglega opnir fyrir þessum möguleika í langtímafjárfestingu. Við gerum okkur grein fyrir því að eins og aðstæður eru þá eru þessir hlutir ekki til sölu, en einhvern tímann verða menn að setjast niður og skoða þessi mál vel," segir hann. „En ríkið ræður því auðvitað alfarið hvort þessar viðræður verða teknar upp eða ekki."

Arnar segir hugmyndina allrar skoðunar virði og telur hana kunna að vera hagstæða fyrir alla hlutaðeigandi. Þannig myndi fjármögnun lífeyrissjóða á verkefnum sem rynni til hlutafjáraukningar Landsvirkjunar verða til þess að styrkja eiginfjárstöðu fyrirtækisins og þar af leiðandi myndu lánakjör þess batna.

olikr@frettabladid.is