Glæfraakstur afbrigðileg hegðun

Ökumenn sem stunda glæfraakstur úti á Granda senda sms-skeyti sín á milli til að láta vita ef lögreglan nálgast. Samgöngustjóri Reykjavíkur segir það hingað til ekki hafa komið til tals að borgin setji upp eftirlitsmyndavélar á svæðinu.

Myndband sem sýnir háværan glæfraakstur við Grandatorg, og sýnd var í fréttum okkar í gærkvöldi, þykir lýsandi fyrir ástandið á svæðinu eftir miðnætti. Vandamálið hefur verið viðvarandi árum saman.

„Auðvitað lítum við þetta alvarlegum augum. þetta bæði skapar hættu í umferðinni og truflar nágrannana," segir Ólafur Bjarnason, samgöngustjóri Reykjavíkur.

Varðstjóri umferðardeildar lögreglunnar, Guðbrandur Sigurðsson, sagði í samtali við fréttastofu í dag að lögreglan hefði reynt margt, en til að ná raunverulegum árangri þurfi öflugt samstarf við borgina. Þannig væri æskilegt að borgin greiddi fyrir uppsetningu hraðahindrana.

Ólafur tekur hins vegar fram að borgin sjái um að leggja vegi sem henta til aksturs þar sem fyllsta öryggis er gætt og vegfarendur fara að lögum.

„Þetta eru svona sérstakar breytingar sem kæmu þarna til álita sem við hefðum vissar áhyggjur af því að sköpuðu þá minna öryggi fyrir aðra vegfarendur svo sem eins og mótorhjólamenn," segir Ólafur og bætir við: „Þetta er náttúrulega afbrigðileg hegðun sem við lítum nú fyrst og fremst á að lögreglan eigi að bregðast við."

Þá hafa íbúar krafist þess að settar verði upp eftirlitsmyndavélar á svæðinu en engin viðbrögð fengið.

Þannig að það í rauninn stendur ekki til af hálfu borgarinnar að setja upp eftirlitsmyndavélar á þessu svæði?

„Nei, það hefur ekki beinlínis komið til tals en þetta er eitt af því sem við munum ræða," svarar Ólafur.

Guðbrandur lögregluvarðstjóri segir ökumennina þaulskipulagða í brotum sínum, að þeir skiptist á að standa vaktir í nágrenni við svæðið og sendi sms-skeyti sín á milli þegar lögreglan nálgast.

Engu að síður hafa lögreglumenn handsamað fjölda brotamanna, meðal annars með því að vera á ómerktum bílum.

„Og það sem er grundvallarvandamálið í þessu eftirliti öllu saman er hvað menn eru fljótir burtu og eru vel á verði gagnvart þeim sem líta til með þeim," segir Ólafur að lokum.

Sjá umfjöllun í meðfylgjandi myndskeiði.