Íslendingar leggja Pussy Riot lið

Íslandsdeild Amnesty International stendur nú fyrir svokölluðu netákalli til að fá rússnesku pönksveitina Pussy Riot leysta úr haldi. Í því felst að Íslendingar geta skráð nafn sitt á undirskriftalista sem svo verður sendur til rússneskra stjórnvalda.

Stúlkurnar þrjár í Pussy Riot eru nú í varðhaldi. Þær hafa verið ákærðar fyrir óspektir eftir að þær sungu mótmælasöng í dómkirkju og bíða réttarhaldanna. Þær gætu átt yfir höfði sér allt að sjö ára fangelsi.

Þær eru meðal annars ákærðar fyrir að ala á hatri og sverta andlegan grundvöll rússneska ríkisins.

Íslendingar hafa tekið vel í þetta netákall og hratt hefur safnast á undirskriftalistann. Hér er hægt að leggja verkefninu lið og fræðast meira um ákæruna í málinu.