Komið í veg fyrir kappakstur veiðimanna að Árbæjarhyl

Stangaveiðifélagið gerir breytingar á veiðisvæðum Elliðaánna í sumar til að koma í veg fyrir kappakstur veiðimanna að Árbæjarhyl, sem hefur hingað til verið á frísvæði.

Á vef SVFR kemur fram að Árbæjarhylur muni nú falla undir veiðisvæði II. Þetta þýðir í raun að veiðisvæði II sem er frá Ullarfossi að Neðri-Móhyl mun nú einnig fá Árbæjarhylinn.

„Ástæðan fyrir breytingunni er helst sú að Árbæjarhylur hefur hin síðari ár verið einn allra besti veiðistaður Elliðaánna, en sérstaklega er hylurinn frábær fluguveiðistaður," segir á vef SVFR. „Því hefur það verið raunin í seinni tíð að nokkurs konar kappakstur hefur átt sér stað við að koma fyrstur að hylnum í morgunsárið - þar sem að hylurinn hefur verið frísvæði."

Vonast Stangaveiðifélagið til að koma í veg fyrir kappaksturinn með þessum breytingum.

„Það er því liðin tíð að þeir sem eiga hraðskreiðasta bílinn fái að kasta fyrstir í Árbæjarhyl á morgnana," segir á vef SVFR.