Tónlistartengd ferðamennska

Á heimasíðu ÚTÓN birtust í vikunni niðurstöður könnunar um veltu vegna komu erlendra ferðamanna á Iceland Airwaves-hátíðina. Fyrir utan menningarlegt gildi hátíðarinnar skapast heilmikil hagræn og samfélagsleg verðmæti.

Í könnuninni kemur meðal annars fram að velta erlendra gesta hefur aukist um 55% frá árinu 2010 og nemur upp undir 700 milljónum ef reiknaður er ferðakostnaður gestanna og eyðsla.

Árið 2007 þegar ÚTÓN tók til starfa beitti skrifstofan sér fyrir því að gerður yrði listi yfir allar tónlistarhátíðir á landinu sem starfað höfðu samfleytt í meira en þrjú ár. Reyndust þær um 30 talsins. Síðan hefur ÚTÓN átt í samstarfi við Íslandsstofu og ferðamálageirann um að bjóða blaðamönnum, listrænum stjórnendum og kaupendum á hátíðir og viðburði.

Í starfi þessu kemur í ljós að tilfinnanlegur skortur er á markvissri fjárfestingu í kynningarmálum og vöruþróun á þessu sviði. Iceland Airwaves byrjaði sem lítið partí árið 1999 og hefur vaxið jafnt og þétt síðan. Áhugi útlendinga á að koma til Íslands og upplifa tónlistarviðburði er mikill enda hafa íslenskir tónlistarmenn og tónhöfundar kveikt í ástríðufullum tónlistarunnendum um allan heim með sköpunarkrafti sínum og elju. Það er fyrir þeirra tilstilli að tengslanet og þekking hefur skapast til að þróa viðburði sem varið er í. Airwaves er einungis eitt dæmi um hversu mikil verðmæti er hægt að skapa í samstarfi tónlistar- og ferðamálageirans. Það er hins vegar mikilvægt að þekking tónlistargeirans á vöruþróun í þessum efnum sé viðurkennd.

Margt hefur áunnist frá því að Airwaves hóf göngu sína og frá því að byrjað var að benda á nytsemi hátíða til að bjóða heim fólki að utan. Ákveðin sýn á þessum málaflokki var fest í viðamikilli stefnumótun skrifstofunnar sem fram fór sumarið 2010 og hefur verið kynnt víða.

En betur má ef duga skal. Stjórnvöld og bæjaryfirvöld víðs vegar þurfa að fjárfesta markvisst í því að tónlistartengd ferðaþjónusta fái svigrúm til að þróast þannig að hún nýtist bæði sem öflugt tæki til að kynna íslenska tónlist og það umhverfi sem hún á heima í. Hugmyndir, tillögur og þekking er til staðar og um leið mælingar á árangri eins og Iceland Airwaves könnunin sýnir.