Lögmaður Hreiðars Más: Ákæran er vonbrigði

Hörður Felix Harðarson, hrl., lögmaður Hreiðars Más Sigurðssonar, fyrrverandi forstjóra Kaupþings, segir það vera vonbrigði að embætti sérstaks saksóknara hafi ákveðið að gefa út ákæru eftir ítarlega rannsókn á Al-Thani málinu svokallaða. Hann staðfesti að ákæra hefði verið birt Hreiðari Má sl. föstudag, en aðrir meðal hinna ákærðu eru Sigurður Einarsson, fyrrverandi stjórnarformaður Kaupþings, Magnús Guðmundsson, fyrrverandi forstjóri Kaupþings í Lúxemborg, og Ólafur Ólafsson, fjárfestir, sem var meðal stærstu eiganda Kaupþings fyrir hrun bankans, eins og greint var frá á Vísi í morgun.

„Það hefur verið látið í það skína í fjölmiðlaumræðu, að þessi viðskipti hafi verið ein allsherjar sýndarviðskipti, en við rannsókn málsins var það upplýst að svo var ekki. Kaupandi hlutabréfanna bar mikla fjárhagslega áhættu af þessum viðskiptum, og þau byggðu á eðlilegum forsendum. Þess vegna eru það vonbrigði að málið sé komið í þennan farveg. Við munum ekki tjá okkur um þetta mál frekar að svo stöddu. Málið fer nú í sinn farveg fyrir dómstólum og á þeim vettvangi verður svarað fyrir það sem snýr að mínum umbjóðanda," sagði Hörður Felix í samtali við fréttastofu í morgun.

Hreiðar Már og Sigurður eru ákærðir fyrir umboðssvik, Magnús fyrir hlutdeild í umboðssvikum, Ólafur fyrir hlutdeild í umboðssvikum en til vara hylmingu og peningaþvætti. Síðan eru þeir allir fjórir ákærðir fyrir markaðsmisnotkun í nokkrum liðum. Málið snýst um lánveitingar Kaupþings banka til sjeik Mohammed Bin Khalifa Al-Thani, bróðir emírsins af Katar, vegna kaupa hans á hlutabréfum í Kaupþingi sem tilkynnt voru 22. september 2008.

Ákært er fyrir markaðsmisnotkun fyrir að hafa „ranglega látið líta út að þekktur fjárfestir frá Katar hefði lagt fé til að kaupa á 5,01% hlutafjár í Kaupþingi og borið á þeim fulla markaðsáhættu." Sigurður og Hreiðar eru taldir hafa skipulagt brotin og eru þeir Ólafur og Magnús ákærðir fyrir hlutdeild í brotum þeirra.

Nafn Magnúsar hefur ekki verið sérstaklega nefnt áður í þessu samhengi, en hann tók við gögnum sem unnin voru á Íslandi. Þá fór hann til Katar til að hitta sjeikinn. Það var hins vegar Hreiðar Már sem samþykkti allar lánveitingarnar án þess að hafa til þess formlegt samþykki lánanefndar, en um var að ræða þrjú aðgreind lán.

Þá er Sigurður Einarsson ákærður fyrir umboðssvik fyrir að hafa farið út fyrir heimildir sínar, sem stjórnarformaður Kaupþings, til lánveitinga. Ólafur er ákærður aðallega fyrir hlutdeild í umboðssvikum, en til vara fyrir hylmingu og peningaþvætti, og er hann sá eini þeirra sem er ákærður fyrir síðastgreindu brotin.

Samkvæmt upplýsingum fréttastofu er stefnt að því að þingfesta ákæruna 7. mars næstkomandi.