Gunnar Nelson samdi við UFC

Gunnar Nelson bardagakappi hefur skrifað undir samning hjá UFC, stærstu samtökum heims í blönduðum bardagalistum.

Þetta kom fram í tilkynningu sem Haraldur Nelson, faðir og umboðsmaður Gunnars, sendi frá sér í kvöld.

„Fyrsti bardagi Gunnars innan sambandsins hefur ekki verið ákveðinn en það mál gæti skýrst í næstu viku. Gunnar er bæði ánægður og stoltur af því að UFC skyldi vilja fá hann í sínar raðir og vonar samningurinn verði upphafið að löngu og góðu samstarfi við UFC," segir í tilkynningunni.

Gunnar er enn ósigraður í MMA-bardögum sínum en hjá UFC mun hann etja kappi við þá bestu á sínu sviði.