Stattu keikur Geir

Stattu keikur Geir Haarde og bregstu vel við Landsdómi þínum. Þú ert lögfræðimenntaður og veist að í því réttarríki sem við búum eru allir saklausir uns sekt hefur verið sönnuð.

Ef þú þiggur þann bjarnargreiða að fá kæruna gegn þér fyrir Landsdómi fellda niður muntu ævinlega lifa í skugga hins óuppkveðna dóms. Hinir þrír fyrrum félagar þínir í ríkisstjórn þinni sem ekki voru kærðir munu búa við deildarmyrkva á sinni orðs tíru um alla framtíð.

Varst þú saklaus eða sekur? Þar mun efinn liggja ef kæran verður felld niður og þjóðin mun spyrja sig: „Var þá enginn stjórnmálamaður ábyrgur fyrir hruninu?“

Ef þú þiggur þann Bjarnagreiða að fá þingið til að falla frá kærunni og ert í raun saklaus, þá hefur þú misst af tækifærinu til að hreinsa mannorð þitt fyrir dómi. Ef þú ert hinsvegar jafnsekur eða jafnvel sekari en skipstjórinn sem vaknar í brú skips síns þegar það er strandað í stórgrýti eða bílstjórinn sem af undirbúnings- og gáleysi skaðar aðra í umferðinni, þá hefur þú sloppið við réttlátan dóm og viðeigandi refsingu.

Það hefur þér væntanlega verið kennt í lögfræðinni á sínum tíma að sé óréttlátt.

Íslendingar elska hetjur og fyrirlíta heigulshátt. Ert þú heigull eða hetja, Geir?