Samsung hagnaðist um 585 milljarða á þremur mánuðum

Tæknirisinn Samsung er orðinn stærsti framleiðandi fyrir farsíma, þar með talið snjallsíma. Nokia hefur til þessa verið stærsti framleiðandi farsíma og hefur haldið þeim árangri síðan 1998. Á fyrsta fjórðungi þessa árs tók Samsung fram úr Nokia, en fyrirtækið framleiddi 93 milljónir síma samanborið við 83 milljónir hjá Nokia.

Hagnaður Samsung, sem er með höfuðstöðvar í Suður-Kóreu, nam 4,5 milljörðum dala á fyrsta fjórðungi ársins, eða sem nemur 585 milljörðum króna. Það er mesti hagnaður Samung á einum fjórðungi síðan á síðasta fjórðungi ársins 2008. Talið er að hagnaður Samung a þessu ári verði sá mesti í sögu fyrirtækisins, og munar þar ekki síst um mikla sölu á snjallsímum á heimsvísu.